Maromak ne’e se no Maromak Nia servisu atu halo saida

Labarik tinan 8 ida hetan trabalho para kaza hosi nia profesora relijiaun, tpc ne’e husu atu isplika kona Maromak ne’e se no Maromak Nia servisu atu halo saida.

Labarik ne’e nia resposta hanesan ne’e:
Maromak nia servisu boot liu mak halo ema. Nia halo ema atu troka ema seluk ne’ebé mate tiha ona, atu nune’e iha ema barak nafatin atu tau matan ba nia kriatura sira iha mundu. Nia lahalo ema bo’ot, Nia halo de’it bebe, tamba bebe ne’e ki’ik no fasil liu atu halo. Tamba ne’e Nia lagasta nia tempu barak atu hanorin bebe sira koalia no la’o. Nia husik hela deit ba bebe nia inan aman sira.

Maromak nia servisu boot seluk mak rona ema nia orasaun. Ema barak mak reza, liuliu Amo Papa, Bispu, padre, madre no katekista sira, sira nia oras toba menus tamba reza barak liu. Maromak laiha tempu atu rona radio no atu hare televizaun tamba tenke rona ema nia orasaun.

Nia sente barullu maka’as iha Nia tilun tamba orasaun tama la para, Nia tilun bele hakmatek kuandu Nia taka tiha Nia tilun. Maromak hare buat hotu-hotu, rona buat hotu-hotu, Maromak iha fatin hotu-hotu ne’e mak halo Maromak tempu laiha. Ne’ebé diak liu o lalika ba gasta tempu husu buat sira ne’ebé o nian laiha ba o nia inan aman.

Ateis mak ema sira ne’ebé la fiar Maromak. Sira nunka ba igreja.

Jesus mak Maromak Nia oan. Nia uluk halo servisu mesak todan deit hanesan la’o iha be leten, halo milagre no koko atu hanorin ema ne’ebé lakohi hatene Maromak. Sira halo propaganda no ikus mai sira hedi Jesus ba cruz. Maibé Jesus ne’e laran diak, hanesan Nia papa, Nia dehan ba Nia papa katak sira lahatene saida mak sira halo no husu atu perdua sira, Nia Aman dehan, OK.

Nia Aman apresia buat hotu ne’ebé Nia halo tiha ona, nia servisu todan hotu iha mundu, nune’e Nia Aman dehan ba Nia katak Nia la presiza ba tan la’o iha luron sira. Nia bele hela ona iha Lalehan. Agora Jesus ajuda Nia Aman rona ema sira nia orasaun no hare buat importante sira ne’ebé Maromak tenke tau matan ba no ida ne’ebé mak Nia tenke tau matan, atu nune’e Nia la book ona Maromak, hanesan sekretaria ida. Buat importante deit mak Nia bele husu ba Maromak.
O bele reza bainhira deit o hakarak, Jesus ho Maromak sei ajuda o tamba agora sira na’in rua ona mak servisu, kuandu ida lisensa, ida seluk iha.

Iha loron dominggu, o tenke ba igreja tamba ida ne’e halo Maromak kontente. Labele haluha ba igreja tamba deit atu halo buat seluk hanesan ba fali tasi. Ida ne’e sala. Loron matan sidauk bele mosu iha tasi leten wainhira lokraik sidauk hotu.

Se o lafiar Maromak, sai hanesan ateis, o sei sente mesak, tamba o nia inan aman sei la la’o ho o ba iha ne’ebé deit hanesan ba haris tasi ka ba fatin seluk maibé Maromak sempre la’o ho o. Presiza ita hatene katak Nia iha ita nia leet, wainhira o ta’uk iha nakukun laran ou wainhira o ta’uk nani no mout tiha ba mota naruk ida. Maibé o tenke hanoin katak Nia sempre la’os fo buat hotu Nai tenke halo ba o. Ha’u hanoin Maromak tau hau iha ne’e maibé Nia bele foti fila fali hau wainhira deit se Nia hakarak.

Tamba ne’e ha’u fiar katak Maromak ne’e iha duni.

istoria deit
OctaSdeC

Dezenvolvimentu Iha Rai Laran Hodi Hasoru Iventu Nasional

Dezenvolvimentu iha Timor-Leste la’o hanesan lenuk, Timor-Leste hamriik mesak liu ona tinan 12 maibé dezenvolvimentu la’o iha fatin. Iha distritu, dalan sira kuak arbiru, obras publiku lori tahu taka raihenek, lori raihenek taka tahu, iha parte seluk SEFOPE loke istrada iha fatin barak iha areia rural sira, maibé kabér lato’o rohan, fulan rua ka tolu deit ku’ak lemolemo rai. Projetu emerjensia kualidade mós urjensia, ladura, maibé dollar hira mak fakar tiha ona ba projetu emerjensia ne’e. Benefisiariu implementasaun projetu mak povu maibé ninia lala’ok ne’e habokur parti balu de’it. Wainhira kontrusaun ida lakualidade I aat iha tempu badak, governu ho emprezariu sira komesa hafuhu malu, se mak atu koalia uluk, se mak sala no se mak loos. Ida-idak defende nia an. Povu mak terus, povu mak sai vítima, maibé povu lian laek no kbiit laek, ne’ebé povu hein de’it ona, diak fali entaun uza ba, maibé sei aat karik buka dalan ka alternativu seluk.

Wainhira povu sei hakilar hela ba bemos, istrada aat, eletrisidade mate lakan, nesesidade baziku karun, governu preokupa loos ho preparasaun atu simu membru CPLP ne’ebé atu mai hala’o Simeira CPLP iha Dili. Projetu emerjersia mos mosu mai nabnaban, kuaze iha Dili laran nakonu ho rai rahun, sobu baleta iha fatin-fatin, hadia istrada hotu iha Dili laran, hadia jardin, hadia edefisiu no realiza inkontru lahotu. Projetu la’o hela maibé lori impkatu ladiak ba povu sira; rai rahun halo me’ar no moras seluk, kanu be nian kotu, ahi mate lakan hela deit, projetu sira ne’e sidauk hatudu ninia ilas loloos. Povu barak kestiona tamba sá governu hakfodak loos ho Simeira CPLP, nusa mak dezenvolvimentu ne’e la’o lalais loos wainhira iha iventu nasional hanesan ne’e. Wainhira iventu ne’e hotu projetu aat, governu sei hare de’it lai, hein to’o grave kedas mak foin tun ho projetu emerjensia.

Espera katak ukun na’in rai Timor ne’e bele ona iha konsiensia ba dezenvolvimentu ne’ebé dura ba tempu naruk, gasta osan ba projetu ne’ebé iha kualidade hodi hadia povu nia moris la’os hadia deit ukun na’in no emprezariu sira nia moris. Povu sei hamlaha, sei terus tamba inundasaun, bemos laiha, sintina laiha, sei tur iha nakukun laran, iskola la hotu tamba ekonomia la sufisiente, povu sei hasoru malnutrisaun no mortalidade infantile. Governu nia politika tenke inklin maka’as ba nesesidade povu nian hanesan benefisiariu.

Hosi
OctaSdeC