Dili Namlaik

Iha Tempu bai loro, rai maran, rai manas halo kulit nakloke hotu. La’o loron manas halo matan mean hotu, rai rahun tama matan laran matan sai moras no katar. Baruk iha uma tamba manas atu sai ba jardin balu iha Dili laran maibe jardin barak mak namlaik tamba laiha manutensaun no laiha konxensia hosi ema Timor rasik. Jardin atu buras no hare furak wainhira aihoris iha laran fó matak no mahon ba ita ema, maibe la’os katak atu hakiak du’ut iha laran. Du’ut hanesan pesti ne’ebé tenke hamoos tiha atu nune’e bele fó fatin ba aifunan ho aihoris sira ne’ebé hakiak iha laran.

Iha tempu ne’ebé hanesan konstrusaun istrada halo ba bebeik iha Dili laran. Sobu tiha husik hela, ateru tiha ho rai, husik de’it. ke’e ku’ak tiha taka de’it ho kalen, husik tiha lai. Tempu anin makaas, anin lori rai rahun ba kose ba ai ho parede sira hare hanesan ema feto ida tau po ba nia oin. Iha hau nia bairo, ateru istrada iha tinan kotuk kedas maibé laiha mudansa. Alkatraun sidauk tama to’o iha neba. Foin loron hirak liu ba, kompañia balu ba ateru tan estrada hodi rai henek kahur ho rai rahun.  Fou-foun sira badinas rega maibé liu semana balun sira mos baruk ona. Populasaun ne’ebé hela besik ba mak tenke badinas rega se sira lakohi simu rai rahun. Rai rahun sira ne’e halo aifunan ho ai tahan sai mutin hotu no namlaik. Sidade mós namlaik hotu. Rai rahun mós lori moras oioin ba ema liu-liu ba labarik sira.

Jardin hira kedas mak iha Dili laran maibé ladun iha tratamentu ne’ebé di’ak. Ema sei soe fo’er iha jardin laran. Fo’er sei namkari iha dalan ninin sira, balun ra’ut ona barak mak so’e arbiru hela. Aat liu mak, populasaun sira sunu fali fo’er ne’e iha tempu loron, tempu ne’ebé ema halo hela atividade. Moras hira mak latama ba isin. Animal mós oioin de’it mak husik iha kapital Timor-Leste ne’e. Dili sidauk buras loloos. Konxensia ita ema Timor nian sei menus liu, interese ukun na’in sira nian mos sanak barak liu, dezenvolvimentu ba rai doben ida ne’e sei la’o iha fatin to’o ita ida-idak iha ona konxensia atu tau interese nasional aas liu hosi interese sira seluk.



Octaminec