Inbui ho Fini Forerai Falun Ida

Inbui hanesan feto ran ida hosi area remotas, lor-loron nia hare labarik barak mak ba to’os no natar ho sira nia inan aman. Inbui triste tebes maibé laiha kbiit atu tulun. Nia la’o dook hosi sira nia knua ba sidade buka tulun ba ema riku sira maibé nia fila ho liman mamuk, laiha ema ida mak fiar nia. Loron ba loron situasaun iha nia knua halo nia depresaun, oinsá nia bele buka tulun ba labarik sira ne’e no oinsá bele hamoris ema mukit sira ne’ebé moris hosi aifarina isin ida ho kafé moruk kopu ida. Nia la hakiduk hosi intensaun atu tulun ema mukit sira maske nia rasik moris natoon deit. Nia motivasaun sa’e ba beibeik wainhira hasoru ema riku ne’ebé hatudu nia oin suar no hirus, nia la’o ho fiar an nafatin. La’os ema riku ida de’it mak despreza nia maibé barak ona, nia mós simu tratamentu ladiak hosi ema osan na’in sira ne’e. Maibé Inbui la’o ho oin midar no kontente nafatin, fiar katak sei iha dalan atu tulun nia maluk sira iha nia knua.

Lokraik ida, Inbui ba hasoru riku bo’ot ida iha nia uma iha sidade, nia mai bebeik ona iha uma ne’e, maibé katuas riku na’in ne’e la fó oin ba nia, la fiar nia, pergunta barak mak mosu iha katuas ne’e nia ulun; feto ne’e iha hanoin diak duni ka la’e ka nia bosok deit ha’u. Nia la gosta Inbui mai bebeik iha nia uma. Katuas ne’e hakilar Inbui ho lian maka’as dehan nune’e “hei o sai hosi hau nia uma, ne’e la’os uma ba oan kiak sira, o rona ka lae? Maibé Inbui hamriik metin iha nia fatin, la muda ain husi nia hamriik fatin. Inbui husu ba riku ne’e dehan” Señor ajuda netik hau nia alin ki’ik sira iha hau nia knua ba, hola netik lapizeira ida, kadernu ida no lilin falun ida, sira moris mukit loos, maibé sira iha hakarak boot atu iskola. Señor ne’e hanesan riku na’in ba iha setór agrikultura nian, nia iha rai luan, fini barak no oioin de’it. Wainhira koalia hela ho Inbui, señor ne’e kaer mós ho fini forerai falun ida. Inbui husu atu impresta fini ne’e lori ba kuda iha nia knua. Katuas ne’e la fiar maibe nia lakohi ona hare Inbui iha nia uma, entaun ho obriga an katuas ne'e fó deit ona fini forerai ne'e ba Inbui.

Inbui fila ba nia knua lori ho fini forerai ne’e, nia komesa servisu maka’as organiza nia maluk sira atu kuda forerai ne’e. Sira halo grupu hodi kuda fini ida ne’e, ho sira nia servisu maka’as fini falun ida ne’e nakfilak tiha ba to’os forerai hektares ba hektares. Agora Inbui dada iis ona tamba nia objetivu atu tulun labarik sira ba iskola bele realiza ho lalais, hosi rezultadu fa’an forerai ne’e, Inbui ho nia komunidade sira hari iskola oan ida no fasilita labarik sira nia nesesidade ba iskola, la’os ne’e deit maibé ekonomia iha knua ida ne’e mós sa’e ba beibeik, komunidade sira moris diak ho saudavel.

Inbui ba sidade lori ho fini forerai falun ida atu ba fó fila fali ba señor riku na’in ne’e. Señor, hanesan hau dehan tiha ona ba ita, fini ne’e hau impresta deit, agora hau lori fila fali mai intrega ba ita. Señor ho hakfodak, ba kedas Inbui nia knua atu hare direita saida mak akontese iha ne’eba. Loos duni, forerai barak iha to'os luan, komunidade nia moris mós diak, labarik sira ba iskola ho kontente. Entaun, señor ne’e laran mamar ona no nia hanoin ba Inbui mós sai pozitivu. Agora señor riku na’in ne’e mak sosa forerai sira ne’e I nia mós tulun tan fini seluk ba komunidade.

Inbui nia misaun atu ajuda nia knua susesu. Funan nakonu ba Inbui.

****istoria inspirativu*****Octaminec@gmail.com